Club Poetico

Ah luna, luna, lunella...
bella, janca e ttonna...
allumma, schiarisce
e abbagliame 'e suonne.

Fa ca ogni ccriaturo
nun appena se sceta,
trova pace e ammore
'int'a ttutto 'o pianeta.

Fa ca ogni mamma,
ca p' 'o figlio sujo
lotta e ccumbatte,
tene sempe p'isso astipato,

tantu miele e llatte.
Fa ca vicino a ogni cconnola
nce sta na nunnarella,
ca canta na ninna nanna

a na bbella nennella.
Fa ca 'int'a ogni ccasa
nasce nu criaturo,
ca tene annanze a isso

nu granne e lluongo futuro.
Fa ca tutte ll'uocchie
abbrillano pe quaccosa c'abbaglia
e nno pe nu fuoco 'e paglia

ca c' 'o calore se squaglia.
Fa ca ogni vvocca
sarrà sempe 'e zucchero chiena
e nun pruvarrà maje

'o sapore amaro d' 'o vveleno.
Fa ca ogni nnaso d' 'e mmagnolie
sentarrà ll'addore e maje cchiù
puzza 'e cuorpe massacrate

e ccu 'e stentine 'a fore.
Fa ca ogni mmana,
astregnarrà n'ata mana,
pecché tutte aunite

se va cchiù lluntano.
Fa ca tutt'e 'e piede,
se nfunnarranno sulo
d'erba nfosa 'e rugiada

e nun calpestarranno
cchiù 'o sanghe 'e muorte accise,
d' 'e cuorpe marturiate.
Fa mmodo ca ogni nnave

quanno trase 'int'ô puorto
trova nu faro ca 'a guida
e lle dà cunfuorto.
Fa ca femmene e uommene

nun se faranno cchiù 'a guerra...
e cca nce starrà tant'armunia
fra tutte 'e popole d' 'a terra.
Fa ca 'stu quarto 'e vita

ca mm'è rrummasa,
pozza essere avvellutata
comm'a na stola 'e raso.
Luna, lunella prumiettene

ca quanno arriva 'o mumento,
me purtarraje ngiro
ncopp'a na connnola d'argiento.
Vieneme a ppiglià 'e notte,

po' nun appena
schiara 'a nova jurnata
puorteme arreto...
accussì pe n'attimo surtanto...

m'illudo ca so' tturnata.
'O ssaccio, 'o ccapisco...
ca ognuno fa chello ca po' ffa'...
però luna lunella, fosse assaje bello...
si mme putisse accuntentà.
Giovanna Balsamo