Club Poetico

Che ccazzimma tene 'a vita,
quanno 'int'ô mmeglio te lassa:
pure si vede ca t' 'a spasse,

te strattona e tt'arrepassa.
T'abbandona bello e bbuono,
senza te cercà 'o permesso,

se nne va a ll'intrasatto,
lassannete comm'a nu fesso.
'A morte cu ppacienza aspetta...

nun se trova maje llà pe ccaso:
bburiosa e ppretenziosa,
te leva 'a vita 'a sott'a 'o naso.

Pure si vaje cuonce cuonce,
o faje poco rummore
e t'addecrie 'int'â vita,

gustanno ll'addore, 'o sapore;
essa sta ggià llà acquattata...
t'afferra, te piglià e ddice:

" 'sta vota attocca a tte..."
e ttu comme 'a cuntraddice!
Nun lle daje cunfidenzia...

ma quann'essa s'è ncurnata,
pure si faje resistenza;
int'a nniente t'ha afferrato.

Può ffa' pure carte faveze,
'o bbuffone, 'o smargiasso,
cu essa nun può ddicere:

"va bbuono... 'sta vota passo."
Può avè tutte 'e rragione,
cu essa haje sempe tuorto:

quanno vene e sse ncorna,
'int'a nniente si' mmuorto.
Pecché essa è na nfamona,

nsulente e ccazzimmosa:
nu' lle fa' specie niente;
manco 'o cchiù 'e ogni ccosa.

Può ttenè pure 'e bbrillante,
chello ca costa cchiù caro:
anfore, casce 'e rubbine,

diamante e pperle rare.
Nun lle mporta comm'è 'a pelle,
quanno tu si' bbrutto o bbello,

si hê cammenato paro paro
o si hê fatto 'o paro e 'o sparo.
Può ttenè assaje sorde:

sott'a 'o lietto, 'int'ê bbuatte,
tutto ll'oro d' 'o munno:
cu essa no, nun scinne a ppatto.

Quanno passe chella porta,
si' ggeneroso o si' avaro
si' straricco o puveriello...

...nun te servono 'e denare.
Chello ca nvita hê guadagnato,
mbruglianno o cu onestà;

quanno trase a ll'atu munno,
nun te serve...resta ccà.
È accussì ca va 'o munno,

ogge a tte, dimane a mme.
Chisto è o' ccunto,
chesta è 'a ammasciata:

simmo eguale io e tte.
Nisciuno è mmeglio 'e n'ato:
chisto è 'o fatto...e cchest'è.