Club Poetico

Tenco nu bicchiere mano a che so nnata,
è 'a dota mia, mammà mme m'ha rialato.
Quanno eva chino chino nfino a ncoppa,
me nn'aggio fatto 'e bbevute cu 'sta vocca.

Mo ca 'o bbicchiere s'è qquase svacantato,
ce metto tiempo pe mme fa' na surziata.
'O pprincipio aggio bbevuto overo assaje,
bbevevo bbevevo, senza me fermà maje.

'O tiempo passa, nu sciuscio e tte saluto:
'o liquido d''ô bicchiere è qquase fernuto.
Si tenc'a vocca secca, 'a lengua mpastata,
bbevo poco, pe me tenè 'o riesto astipato.

Mme guardo cu ttimore ogni gguccetella:
ogni ntanto cuntrollo p'ammesurà 'o livello.
È bbevo ancora, ma nun stongo cuieta:
doppo bbevuto mme rummane 'a sete!

Fosse bbello si tenesse tant'osterie,
addó se bevesse assaje, ccu superchiaria.
Ne putesse ordinà casce chiene 'a n'oste,
nne cercasse mille, facenn'a faccia tosta.

Passasse 'e gghiurnate cu ttanta frennesia,
brindanno 'a saluta 'e ll'ate e ppure 'a mia.
Purtroppo primma o poje fernesce â vita:
'e a mme m'è è rrummaso quacche ddito.

E i' faccio comm'a ll'oste, 'o canteniere,
m'assetto, aspetto 'o turno mio, ntanto bbevo.
Bbevo e 'sti gguccetelle 'e vita mme surzeo,
nfin'a qquanno arrivo nfin'a nfunno 'o bicchiere.