Club Poetico

'O cane nun t'abbandona, te sta vicino:
nun fa differenza fra gruosse e ppiccoline.
Nun tene odio, nun prova maje rancore:
'e cchin'e pile, ma nun 'e ttene ncopp'ô core.
Nun tene furbizia, cattiveria, né ambizione:

ll'abbasta na carezza, ll'affetto d' 'o patrone.
Si ll'ate se nne vanno, isso te sta affianco,
nun se mporta si tien'a pelle scura o janca.
Nun guarda si tien'a vesta sana, stracciata,
nun se mporta si si' struito, si hê studiato.

Nun guarda si si' aveto o puorte 'e tacche,
nun se mporta si si' bbrutto, sicco, chiatto.
Isso nun guarda niente, te vo' sta' vicino:
è ffelice quanno 'o faje juocà c' 'a pallina!
Vo' ben'a ognuno: ô bbuono, ô malamente:

p'isso so' ttutte eguale, pur'o cchiù fetente.
Nun te giudica maje, è n'anima innocente:
ll'abbasta ca ce staje; isso s'accuntenta.
Quanne tuorn'â casa, è 'o primmo fra tante,
ca te fa 'e ffeste, te fa sentere mpurtante.

È ccomm'a n'angelo sciso ncopp'â terra,
addó nun ce sta pace: se fa semp'a guerra.
Pure si 'o faje male e nun 'o tratte bbuono,
nun te porta rancore, sempe te perdona.
Pure si 'o lasse sulo ncopp'a ll'autostrata,

isso nun se n'accorge ca ll'hê abbandunato.
A ogni machina ca passa move fort'a coda:
aspetta e spera 'e te vedé ancora n'ata vota.
Attaccato a nu palo s'accucciulea, aspetta:
cu assaje pacienzia sta llà, nun tene fretta.

Manco quanno se fa sera: tene sete, fame,
capisce quanno ll'omme sap'essere nfame.
Aspetta e spera ma 'a corda è troppa corta:
vulesse correre, ma triste è stata 'a sciorta.
Stanco chiude ll'uocchie, vede ll'acobaleno

e nun sente cchiù dulore: llà tutto è sereno.
Trase 'int'a nu munno senz'essere umane...
addó nun ce stanno perzone, né crestiane.
Llà d''a cattiveria 'e ll'uommene è lluntano:
cuntento e ffelice, corre nziem'a ll'ati cane.