Club Poetico

Preputente, arraggiuso, scrianzato,
tira e votta cavece 'a fore 'e ffeneste. 
Te trase dinto 'e capille e maliziuso,
se 'nfizza curiuso sotto 'e vveste. 
Quanno stà sfastedjato e chiove, 
votta acqua a zuffunne p'ê ccase.
Sbatte 'e pporte, scassa ll'arbere,
fuje pe llà attuorno comm'â 'nu 'nvaso. 
'E vvote stà quieto e te parla chiano:
s'appoja delicato 'ncoppa 'e mmane. 
T'accarezza 'o viso, te parla doce 
e te trase dinto chianu chianu.
Se 'ntrufola curiuso dintê rrecchie: 
'nu poco bruntulianno se 'ntallea,
po' 'mpruvvisamente scioscia, sbuffa
e scutuliannese vene e te schjaffea. 
Si 'o saje piglià isso s'addulcisce,
ma spisso allucca forte e te sturdisce.
A vvote dice cose ca 'nun sanno 'e niente:
se mette a murmulià parole sfaticate,
ca se ne vanno sbuffanno 'nsieme 'o viento...