Club Poetico

Addorano 'e fatica 'e mmane d' 'o piscatore,
quanno s'arretira sott'â luce d' 'a lampara.
Sardulelle e alice astrette 'int'ê cceste,
stanno ammiscate a quacche frutt'e mare.

Nu ventariello scioscia 'a varca sulagna
n'onna leggiera vucanno ll'accumpagna.
'A varchetella se riflette dint'ô mare
e ll'acqua lucente abbrilla sott'a luna.

'Int'ô scuro pigliene forma ll'ombre,
ogni cosa ca se move è ttutta bruna.
S'appapagna 'o marenariello stanco,
ncopp'ô llegno ummedo 'e na panca.

A ll'intrasatto chiena 'e sicummera,
a ppilo d'acqua sponta na capa nera.
Ll'uocchie celeste chine 'e guccetelle
s'arrapeno e se nzerrano comm'a ffeneste.

Bbella e annura comme mammà ll'ha fatta,
accumpare na femmena priva 'e ogni veste.
Sulamente 'o pietto è a mmalapena,
cupierto per mmità 'a na cunchiglia.

Capille luonghe ondulate e cchine 'e sale,
lle cummogliano nu poco 'o naso, 'e cciglie.
Ncuollo na cullanella fatta 'e curallo,
assaje longa...ll'arriva abbascio ê sspalle.

Comme ricchine tene ddoje stelle marine,
'o polso nu vraccialetto giallo e tturchino.
Mpruvvisamente comme pe ncanto,
se leva ncielo 'a melodia 'e nu canto.

È 'a vocia 'e chella femmena misteriosa,
ca mentre canta ncopp'â varca s'arreposa.
Chianu chiano s'avvicina ô piscatore,
ll'accarezza mentr'isso dorme ancora.

S'avota 'o tiempo, 'a varca s'arravoglia:
lampe e ttronnele vatteno forte 'e scoglie.
Accussì 'o piscatore, 'a varca cu 'a lampara,
vanno a fernì deritte nfunno ô mare.

Nun se sape si fuje opera 'e chella criatura
o si se trattaje sulo 'e nu sfogo d' 'a natura.
Na cosa è certa, quann' 'a luna è cchiena,
mmiez'ô mare se sent' 'o canto 'e na sirena.