Club Poetico

Vedenno 'o cielo azzurro j' m'aggia appriparata. 
'E llente, 'o cazunciello e 'na maglia attillata.

Quanta sensazione mme stanne tuzzulianne:
faccio 'o pizzo 'a rrisa: mme stongo emozionanno.

J' corro appriesso 'o mare, mentre Pusilleco s'avvicina: 
già me pare 'e sentere 'e rrise d'ê bammine.

'O mare 'mbandito: pare 'na tavula apparicchiata: 
'O Vesuvio vestuto a festa se presta a fà 'a purtata.

'Nu castello medievale, fatto 'a ll'Angioine, 
se fà sfrugulia' 'a n'onna cristallina.

Veco p'â Caracciolo carruzzelle addobbate,
e cavalle ca nitriscene cuntente e cunsulate.

C'ô ciuffo 'ncapa se fanno 'na parata,
vuttanne cocche sguardo 'o mare brillantato.

'A coppa Pusilleco te capita' 'e guarda'
'nu panorama assaje bello ca s'adda fotografa'!

Te guarde Capri 'a coppa 'a 'nu balcone 
e quanno 'o tiempo 'o ppermette te siente 'nu lione.

Comm'â na' figliola cu 'e nastre dinto 'e capille,
Napule posa pe tutte quante: gruosse 'e piccerille.

Mentre felice 'a guardo, rignenneme 'e ricchezza, 
mme sento mariola: pecchè 'nun pavo prezzo...