Club Poetico

Quanno mme sento sculurita e tengo n'aria affliggente,
m'addimanno: "che sarrà? Po' penso: "è cosa 'e niente." 
Sarrà forse 'sta vita ca troppo spisso è brutta e amara,
mentre j' 'a vulesse vedè verde comme ll'acqua d'ô mare?

Saranno 'sti brutte penziere ca mme levene 'a fantasia,
o sarrà tutta 'sta freddezza ca mme da tanta malincunia?
'Ncopp'ô stomaco 'nu pisemo arde comme a 'na fiamma.
'O sento muzzecà, alluccà: ma 'nun credo ca è famme!

'Ncanna tengo 'nu nureco ca forte forte mm'astregne,
j' bevo, bevo e bevo: ma 'stu ruospo 'nun se ne scenne.
Cerco tuorno tuorno quaccosa ca luccichea e ca abbrilla,
'mpietto 'nu core cu ll'arteteca, zompa comme 'a n'arilla.  

M'arrobbo cu 'nu specchio quacche raggetiello 'e sole,
'o faccio abbrillà sulo p'ô sfizio d'ô vedè 'e cagnà culore.
J' vulesse parlà 'e sentimente. Pecchè no? Pure d'ammore,
'nvece m'aggia tennere tutto cose annascuso dint'ô core.

Sarrà forse st'aria ammurbata ca me leva 'o sentimento?
Sarranne tutte 'e silenzie, 'e rresate faveze d'â ggente?
Veco ca chello ca pe me è 'mpurtante pe n'ato è indifferente,
allora pur'j' penso e dico: "niente. Sarrà 'na cosa 'e niente..."